యాసంగి వరి సాగులోడ్రమ్ సీడర్ వేదజల్లే పద్ధతిపై రైతులకు అవగాహన

జై భారత్ వాయిస్ న్యూస్ గీసుకొండ
గీసుగొండ మండలంలోని కొనాయిమాకుల రైతు వేదికలో వ్యవసాయ శాఖ అధ్వర్యంలో రైతు నేస్తం ప్రోగ్రాం నిర్వహించారు
ఈ రైతు నేస్తం ప్రోగ్రాంకి ముఖ్యఅతిథిగా వరంగల్ జిల్లా వ్యవసాయ అధికారి అనురాధ, జాతీయ ఆహార భద్రత మిషన్, ఉమ్మడి వరంగల్, జిల్లా కన్సల్టెంట్ సారంగం, గీసుగొండమండల వ్యవసాయ అధికారి పి. హరి ప్రసాద్ బాబు, వ్యవసాయ విస్తరణ అధికారులు రైతులు హాజరైనారు. ముందుగా రాజ్యాంగ దినోత్సవం ఫై రైతులకు, అధికారులకు అవగాహన కలిపించి వారి తో ప్రతిజ్ఞ చేయించడం జరిగింది.
అనంతరం రైతులకు యాసంగి వరి సాగులో డ్రమ్స్ లీడర్ లేదా నేరుగా వెదజల్లే పద్ధతిలో రైతులకు సలహాలు సూచనలు అందించడం జరిగినది.ఎరువుల గోడౌన్ ఇన్స్పెక్షన్ నిర్వహించడం గీసుగొండ మండలంలో గీసుగొండ, కొనాయిమాకుల, కొమ్మాల, మరియపురం, ధర్మారం గ్రామాలలో రైతు క్షేత్రాలను సందర్శించడం జరిగింది. యాసంగి వరి సాగులో డ్రమ్ సీడర్ లేదా వేదజల్లే పద్ధతి లో రైతులకు సూచనలు తెలియపరిచ్చినారు.వరంగల్ జిల్లాలో యాసంగి వరి సాగు చేయుటకు నవంబర్ 10 వ తారీకు నుండి డిసెంబర్ 20వ తారీకు వరకు వరి నారు పోయుటకు అనుకూలమైన సమయం.ఈ యాసంగి లో స్వల్పకాలిక రకాలు మాత్రమే సాగు చేసుకోవాలని జిల్లా వ్యవసాయఅధికారి అనురాధ రైతులకు సూచించారు.మన ప్రాంతానికి అనువైన సన్న రకాలు తెలంగాణ సోనా ఆర్ఎన్ఆర్15048, కేఎన్ఎం 1638, wgl 962, ఆర్ఎన్ఆర్ 21278, కేఎన్ఎం 733, WGL 1119 రకాలు సాగుకు అనుకూలం. అలాగే దొడ్డు రకాలు సాగు చేయుటకు జేజిఎల్ 24423, కేఎన్ఎమ్ 118,RNR 29325, జేజిఎల్ 18047, MTU 1010 మొదలగు రకాలు సాగు చేయుటకు అనుకూలమన్నారు. ఇందులో తెలంగాణ సోన రకమును మాత్రము డిసెంబర్ 10 తర్వాతనే విత్తుకోవాలి. మిగతా అన్ని రకాలు నవంబర్ 10 వ తారీకు నుండి విత్తుటకు అనుకూలం.డిసెంబర్ 20 తరువాత విత్తితే అధిక ఉష్ణగ్రత్త వలన నూక అధికంగా వచ్చును. అకాల వర్షాలతో పంటలకు నష్టం జరుగును. నర్సంపేట డివిజన్ మండలాల్లో పాకాల చెర్వు క్రింద ఉన్న రైతులు ఆలస్యంగా వరిసాగు చేయడం వలన వరి పంటలకు నష్టం కల్గుతుంది. ఏప్రిల్ మొదటి పక్షం లో కోతకు వచ్చే విధంగా యాసంగి వరి సాగు చేసుకోవాలని అన్నారు.

డ్రమ్ సీడర్ తో విత్తు పద్ధతి లేదా వెదజల్లే పద్ధతి :

తెలంగాణలో వాతావరణంలో వస్తున్న మార్పుల మూలంగా సకాలంలో నార్లు పోయక పోవడం మరియు నాట్లు వేయడం ఆలస్యం అవడం వల్ల వరి దిగుబడులు తగ్గుతున్నాయి. దీనివలన నారును నెల రోజుల పాటు పెంచి నారు పీకి నాటు వేయడానికి అధిక ఖర్చు అవడమే కాక నీటి వాడకం కూడా అధికమవుతుంది.కూలీల కొరత కూడా చాల ఉంది.ఈ నేపథ్యంలో డ్రమ్ సీడర్ లేదా వెదజల్లే పద్ధతి తో వరిని నేరుగా పొలంలో విత్తుకోవచ్చునని తెలిపారు.
ఉపయోగాలు:
ఈ పద్దతిలో నార్లు పెంచి, నాటు వేసే అవసరం లేదు. కాబట్టి నాటుకు అవసరమైన కూలీల ఖర్చును ఆదా చేయవచ్చు.విత్తన మోతాదును సగానికి సగం తగ్గించవచ్చుని వివరించారు. డ్రమ్ సీడర్ పద్ధతిలో విత్తినప్పుడు ఒక చదరపు మీటరుకు ఉండవలసిన మొక్కల సంఖ్య ఖచ్చితంగా ఉండడం వల్ల వరి దిగుబడులు నాటు వేసిన వరికన్నా అధికంగా ఉంటాయి.సాళ్ల మధ్యలో యంత్రాలతో అంతరకృషికి వీలుంటుంది.నాటువేసిన వరి కన్న 7 -10 రోజులు ముందుగా వరి కోతకు వస్తుందని అన్నారు..
నేల తయారీ:
సాధారణ పద్దతిలో కంటే వీలైనంత బాగా చదును చేసుకోవాలి. ఎత్తు పల్లాలు లేకుండా సమాంతరంగా ఉండడం చాలా అవసరం. పొలంలో నీరు నిలువ ఉండకూడదు కాబట్టి నీరు ఎక్కువైతే బయటకి పోవటానికి ఏర్పాట్లు చేయాలన్నారు.. పెద్దగా ఉన్న పొలాలను చిన్న మడులుగా విభజించుకుంటే చదును చేయడానికి నీరు పెట్టడానికి, విత్తనం చల్లడానికి ఎంతో అనుకూలంగా ఉంటుంది. విత్తే సమయానికి నీరు లేకుండా బురద ఉంటే చాలు. ఇసుక శాతం ఎక్కువగా ఉన్న నేలలో విత్తలనుకున్న రోజే ఆఖరి దమ్ము చేసి చదును చేసి పలుచటి నీటి పొర ఉండేటట్లు చూసుకోవాలి. బంక నేలల్లో ఆఖరి దమ్ము చేసి చదును చేసిన మరుసటి రోజు విత్తుకోవచ్చని సూచించారు.
విత్తన మోతాదు:
రకాన్ని బట్టి ఎకరాకు 10 – 15 కిలోలు అవసరమవుతాయి. కాండం గట్టిగా ఉండి వేరు వ్యవస్థ ధృడంగా ఉండి పడిపోని రకాలు మిక్కిలి అనుకూలం. ఆయా ప్రాంతానికి అనువైన, రైతుకు ఇష్టమైన ఏ రకమైనా ఈ పద్ధతిలో సాగు చేసుకోవాలని సూచించారు.

విత్తన శుద్ధి:
లీటరు నీటికి ఒక గ్రాము కార్బండిజమ్ కలిపినా ద్రావణంలో 1 కిలో విత్తనాల చొప్పున 12 -24 గంటలు నానబెట్టి 24 గంటలు మండెకట్టి కొద్దిగా ముక్కు పగిలిన గింజలను వాడుకోవాలన్నారు..
విత్తే దూరం:
డ్రమ్ సీడర్ డ్రమ్ములో మొలకెత్తిన విత్తనాలను నింపి మూత బిగించాలి. గింజలు రాలడానికి వీలుగా ప్రతి డ్రమ్ లో కేవలం 3/4 వంతు మాత్రమే మొలకెత్తిన గింజలను నింపాలి. గింజలు నింపిన డ్రమ్ సీడర్ లాగితే 8 వరుసల్లో వరుసకు వరుసకు మధ్య 20 సెం. మీ. దూరంలో గింజలు పడతాయి. వరుసల్లో కుదురుకు కుదురుకు మధ్య దూరం 5 – 8 సెం. మీ. ఉంటుంది. ఒక్కో కుదురులో 5 – 8 గింజలు పడటం జరుగుతుంది. కొన్ని అనివార్య కారణాల వల్ల కుదురులోని గింజలు 50 శాతం దెబ్బతిన్నా మిగిలిన 50 శాతం గింజల నుండి వచ్చిన మొక్కల సాంద్రత సరిపోతుంది. రకాన్ని బట్టి గింజలు పడటాన్ని బట్టి రంధ్రాలను స్టాపర్స్ తో మూసుకోవాలి. సన్న గింజ రకాలకు రంధ్రం వదిలి రంధ్రం మూసివేయాలి. 16 వరుసలకు అడుగు వెడల్పు కాలిబాటలు ఉంచుకోవాలి. తాడును వినియోగించి డ్రమ్ లాగితే వరుసలు బాగా వస్తాయి. కోనోవీడర్ తిప్పడానికి వీలుగా ఉంటుంది.
వెదజల్లే పద్ధతి లో అనుభవం కలిగిన వ్యక్తి ద్వారా బురద పదనులో సమానంగా చల్లాలి.
ఎరువుల యాజమాన్యం:
సాధారణ పద్ధతి లో సిఫార్సు చేసిన ఎరువులనే ఈ పద్ధతిలో కూడా వాడుకోవాలి.పూర్తి భాస్వరం మరియు సగం పొటాష్ ఎరువులను ఆఖరి దమ్ములో వేయాలి. మిగిలిన పొటాష్ ను చిరు పొట్ట దశ లో నత్రజని ఎరువులతో కలిపి వేసుకోవాలి.దమ్ములో అధిక నత్రజని ఎరువులు వేయకూడదు కలుపు ఎక్కువగా వస్తుంది. దమ్ములో 3 బస్తాలా సింగిల్ సూపర్ పాస్ఫేట్ లేదా ఒక బస్తా డి. ఎ. పి, 15 కిలోల మ్యూరేట్ ఆఫ్ పొటాష్ వేసుకొని, విత్తిన 15 రోజులకు, పిలక దశలో మరియు చిరుపొట్ట దశలో ఎకరాకు 40-45 కిలోల చొప్పున యూరియా చల్లుకోవాలి. ఆఖరి దఫా యూరియాతో పాటు 20 కిలోల మ్యూరేట్ ఆఫ్ పొటాష్ తప్పనిసరి వేయాలి.
కలుపు యాజమాన్యం:
ఎకరాకు ప్రెటిలాక్లోర్ + సేఫ్ నర్ మందును 600 – 800 మి. లీ. విట్టిన 3- 5 రోజుల లోపు లేదా పైరజోసల్ఫ్యూరాన్ ఈథైల్ 80 – 100 గ్రా. 8 – 10 రోజులలో ఇసుకలో కలిపి పలుచటి నీటిపొర ఉంచి చల్లాలి.
ఎకరాకు సైహలోఫాప్ పి బ్యుటైల్ 300 మి. లీ. (ఊద. ఒడిపిలి)లేదా ఫినాక్స్ ప్రాప్ పి ఇథైల్ 250 – 300 మి.లీ. విత్తిన 15 రోజులకు లేదా బిస్ పైరిబాక్ సోడియం 100 మి. లీ. విత్తిన 20 రోజులకు 200 లీటర్ల నీటిలో కలిపి పిచికారీ చేయాలి. బిస్ పైరిబాక్ సోడియం వెడల్పాకు గడ్డి జాతిని కూడా అరికట్టును. వెడల్పాకు కలుపు నివారణకు 2,4 – డి సోడియం సాల్ట్ ఎకరాకు 400 గ్రా. విత్తిన 25 – 30 రోజులకు పిచికారీ చేయాలి. పంట దశను, కలుపు రకాన్ని బట్టి కలుపు మందును ఎంచుకోవాలి.
నీటి యాజమాన్యం:
విత్తిన తరువాత మొదట్లో నీరు లేకుండా బురదగా మాత్రమే ఉంచాలి. నీరు నిల్వ ఉన్న చోట మొలక రాదు. ఆ తర్వాత పలుచగా నీరు ( 2- 3 సెం.మీ. ) పిలకలు తొడిగే దశ వరకు ఉంచితే సరిపోతుంది. పైరు పొట్ట దశ నుండి పంట కోసే 7 – 10 రోజుల వరకు నాటువేసిన పొలం మాదిరిగానే నీటి యాజమాన్యం పాటించాలి.
ఈ పద్ధతి చౌడు నేలలకు, నీటి ముంపుకు గురి అయ్యే ప్రాంతాలకు అణువు కాదు.
పొలం ఎత్తు వంపులు లేకుండా చదునుగా ఉండాలి లేనట్లయితే నీరు నిల్వ ఉండి మొలక మురిగి, మొక్కల సంఖ్య తగ్గిపోతుంది. ఈ
పద్దతిలో కలుపు నివారణ తప్పకుండ చేయాలి.పంట దిగుబడి సాధారణ పద్ధతి తో సమానంగా వచ్చును. మంచి యాజమాన్యం చేస్తే ఎక్కువ దిగుబడి తో పాటు నికర ఆదాయం ఎక్కువగా వచ్చును.